بسم الله الرحمن الرحيم
صدقينى خفت منك
رغم إنك برضو أمى
وإن همك هو همى
وإنى م المفروض يا مصر
دوغرى أشعر بالأمان
لما حضنى يبات فى حضنك
بس والله صدقينى
وأعذرينى
خفت منك
أيوه والله خفت منك
لما شفت الظلم سايد
والفساد على بيضه راقد
كل يوم يفقس ويكبر
والهموم فى قلوبنا تكتر
وأنتى برضو زى مانتى
فاتحه للكل دراعاتك
اللى صهيونى
واللى صاينك
اللى حافظ
واللى خاينك
اللى إيده نضيفه زيك
واللى عاش العمر كله
ينهبك يلهف فى رزقك
كلهم يتساووا عندك
صدقينى خفت منك
رغم إنك
لسه وخدانى فى حضنك
اعذرينى خفت منك
وإفتكرك شاعرنا لما فى مرة قالك
يا بلدنا يا بلد "
هو من امتى الولد
بيخاف من أمه
لما فى الضلمه تضمه
خفت منك صدقينى "
وإفتكرتك
إفتكرتك وأنتى ساكته
ع اللى ظالمنى وظالمك
اللى هاينى وهاينك
اللى بيموت نهارك
واللى عيّب بكره عنك
أنتى ساكته
وفاتحه للكل دراعاتك
لما قطر المجد فاتك
ليا عندك ألف حق
إنى أصرخ بأعلى صوت
وأنخلع يوم م السكوت
حتى لو هأصرخ وأموت
حتى لو كنتى تلومينى
أعذرينى
خفت منك
خفت منك
صدقينى