قرأت هذه القصه الطريفه في احدى المجلات واحببت ان تشاركوني في قرائتها
القصه لكتاتب اسمه او لقبه عاشق الماغوط
اليكم القصه كما هي
اخونا الموظف المسكين يحكي قصته مع صحن اللحمه
كالعادة .. طول نهارنا مشغولين.. وما منفضى لآخر الليل , يعني ازا تغدينا عالساعة 7 منكون كتير مبكرين بس اليوم الغدا كان غير شكل ,
صارت الساعة 6:30 وصرنا نسأل بعض بالشغل شو بدنا ناكل اليوم يا شباب بهاء اقترح علينا قشقوان ومرتديلا لأنو فيها تغيير عن الشاورما والفروج وأكلة خفيفة ونضيفة , بس الشباب قطعو كلامو : بدك نتغدا جبنة وقشقوان ونحنا مالنا غير هالوجبة طول اليوم والله منفرط .. نط وسيم قال : أخي منجيب فلافل وفول وحمص وخلصنا , الشباب : دخيلك شو رايق .. والله بهالشوب ازا مناكل هيك منفطس , فجأة صوت من المكتب جوا عم يقول : سمع يا شباب سمع نضال بيك يتكلم.. شو رأيكون بيتزا , الشباب : سد بوزك ولي على آمتك شو سئيل يعني مبارح أكلنا فطاير .. شو كل يوم عجين ...( وأنا الله الوكيل ديناصورات بطني هاجت والعصافير هاشت ....)
قطعت كلام الكل : مشان الله خلصونا شو اختراع .. ماعاد تعرفو شو بدكون تتزهرمو .. هية حشي مصران وفكت يا عرب ,
الشباب : دخيلك شو عملي .. أحسن من هالمحاضرة اقترحلك شي أكلة .. ,
أنا : ( القصة مسؤولية يا جماعة .. شو بدنا ناكل .. شو بدنا ناكل .. هممممم ) بسيطة
الشباب : شو .. هات لشوف .. أتحفنا
أنا : منجيب من الميدان طبخ أظبط شي .. كل واحد بياخد الوجبة يللي بدو ياها
الشباب : والله فكرة
وبأعلى صوت فز أديب من عل الكرسي وقال : لا عمي أنا ما بتوفي معي جيب وجبة من الميدان .. معاشي على قدي وعايف حالي .. جيبو انتو وانا باكل أي شي ب 50 ليرة ,
الشباب : لا والله .. مو عيب عليك هالحكي
انت أخونا ومنا وفينا وأحلى عزيمة من الشباب
أديب : لا حبيبي هي مو عزيمة .. وأنا ما بحب حدا يشفق عليي
ع راسي الشباب كلها .. انتو غاليين .. بس مستحيل أقبل ,
أنا : لا حول ولا قوة الا بالله .. مشان الله حللوها .. يعني بدنا أكلة طيبة وظريفة والكل يحبها ومو أكتر من 50 ليرة عالراس .. لأنو أنا كمان ما برضى ناكل شي .. وأديب ياكل شي تاني
متلنا متلو .. ( سكت الكل .. وما حدا عرفان شو بدو يحكي )
وبلا طول سيرة .. فات جارنا أبو رضا .. مسا الخير يا شباب .. أنا بدي جيب مندي .. حدا بدو أعمل حسابو معي ..
أديب : أديش النفر
أبو رضا : 250 جاج.. 350 لحمة
أديب : نفر الجاج بيكفي خمس أشخاص
أبو رضا : طبعا" بيكفيهون بس ازا كانوا آكلين هههههههه
أديب : عم تتمسخر عليي
أبو رضا : لكان سؤالك بينسمع هههههههه
أنا رايح حللو عنا شباب فاقسين
نضال : تزكرت انو عاملين محاشي رح روح جيب من البيت والكل عزيمة
الشباب : حيووووووووووو نضال
( راح نضال .. بعد شي نص ساعة رجع ايديه فاضية )
الشباب : لك شو ويييييييين الأكل
نضال : ما تواخزوني .. الطبخة عل القد .. دوبهون يكفو العيلة
الشباب : خلص مو محرزة كم ساعة وكل واحد بياكل ب بيتو
وبلا طول سيرة صارت الساعة 10:30 والكل فارط
أنا ما سدقت امتا خلصنا شغل وبوشي لعند اللحام
جبت كيلو شرحات وبوشي عالبيت .. في فرن بالحارة .. بدي ساوي شرحات على عجين وأحلى أكلة
.. وصلت عالحارة.. شفت المحل كأني لقيت كنز ..
مسا الخير يا حلوين
الفران : مسا النور
أنا : شرحات على عجين على كيف كيف كيفك
الفران : بعتزر منك .. بعد ال 9 منطفي الفرن
أنا : لا تقولها يستر عرضك
الفران : لا تواخزنا.. ازا بدك صفيان عندي فطاير جبنة وفطاير مرتديلا
أنا : ( بقلبي عم قول لو سمعنا كلام بهاء من الأول )
لا حبيبي مشكووور .. طالع ساوي اللحمات بالبيت شرحات وخلصنا.. سلام
فتت عالبيت..
بوشي عالمطبخ .. مسااااا الخير عائلتي المصونة
العيلة : لك وين فتت بوشك عالمطبخ
تعال لهون .. شو القصة
أنا : لا حدا يحاكيني مالي فاضي
وبلشت شغل وشغلنا هالغاز وحطينا الطنجرة وفرمنا بصلة ودلقنا اللحمات ونقطة زيت ورشة بهارات وملح..
وحرررررررررك بمعلقة الخشب ( مشان ما تتأحوط التيفال )
بعدين نوصت الغاز مشان وعل الهدا .. وأنا عم غني .. عل الهدا .. امشي بهدا .. حلوة وما متلك حدا .. اتدللي .. واتمايلي .. مابيلبق غيرك اليييييييييييي
وبعد ربع ساعة استويت الأكلة .. حطيت هالصحون .. والكاسات ... والخبزات ... والكل قاعد.. بوشي عالمطبخ ..
جبت الطنجرة .. وعالطاولة .. قربولي الصحون كل واحد حصتو ب صحنو .. قسمنا اللحمات
مسكت ربطة هالخبز وبدي بلش ومالقيت غير نكشت صحني بكوعي وعالأرض.. وانكسر صحني ... وانكسر بخاطري معو .. الله وكيلكون فجأة سدت نفسي عن الأكل وحسيت اليوم مو مكتبلي آكل .. قمت وشلت الصحن المكسور واللحمات .. عل المطبخ وأنا بطريقي .. العيلة : معلش انكسر الشر يالله ما صار شي تعال كول معنا ..
أنا : ( حلفت يمين ما رح آكل اليوم ) والعيلة مو عرفانين شو القصة
ونمت جوعاااااااااااااااااااااااان
موضوع: قصة طريفة 
